Փաշինյանը չի մասնակցի Դավոսի համաժողովին
Քաղաքականություն
Նիկոլ Փաշինյանը չի մասնակցի հունվարի 19-23-ը անցկացվելիք Դավոսի տնտեսական ֆորումին։ Այս մասին հայտնում է վարչապետի մամուլի խոսնակ Նազելի Բաղդասարյանը։ Չմասնակցելու պաշտոնական պատճառը ՀՀ կառավարությունից չեն հայտնում։ Նախորդ տարի Փաշինյանը մեկնել էր Շվեյցարիա, մասնակցել ֆորումին, որին մասնակցել էր նաև Ադրբեջանի նախագահ Իլհամ Ալիևը։
Այս տարի Ալիևի մասնակցելու կամ չմասնակցելու մասին տեղեկություններ դեռևս չկան, հայտնի է միայն, որ Վրաստանն այս տարի էլ հրավիրված չէ Դավոսի ֆորումին։ Ավանդաբար Դավոսում կազմակերպվող տնտեսական համաժողովը լավ առիթ է պետությունների ղեկավարների համար նոր կապեր ստեղծելու, հին կապերը թարմացնելու, տարբեր երկրների հետ քաղաքական հարցեր քննարկելու համար, և որևէ պատճառաբանություն չներկայացնել, թե ինչու Փաշինյանը չի ցանկանում մասնակցել Դավոսի համաժողովին, հատկապես որ այդ օրերին առանձնապես լուրջ քաղաքական հանդիպումներ կամ գործողություններ չունի, անհեթեթ է։
Ըստ էության, Փաշինյանը կամ խուսափում է մասնակցել այդ համաժողովին, որին, ի դեպ, այս տարի մասնակցելու է նաև ԱՄՆ նախագահ Դոնալդ Թրամփը, կամ էլ նրան պարզապես չեն հրավիրել՝ հաշվի առնելով ինչ-ինչ հանգամանքներ։ Ցանկացած պարագայում սա խոսում է «կոնկրետ տվյալ երկրի նկատմամբ վերաբերմունքի մասին»։
Աննա Մարգարյան
