Մեր թիմում ունենք մարդ, ով աշխատել է այս կառավարության հետ, կարևոր պայման է՝ մաքուր ձեռքեր և պրոֆեսիոնալիզմ. Նարեկ Կարապետյան
Քաղաքականություն
Մեր թիմում լինելու են մարդիկ, ովքեր աշխատել են բոլոր կառավարությունների հետ, ունենք մարդ, ով աշխատել է այս կառավարության հետ, ունենք նաև այլ կառավարություների հետ աշխատած ներկայացուցիչներ: Կարևոր նախապայմանն է՝ մաքուր ձեռքեր և պրոֆեսիոնալիզմ: Մենք 50 մլն չենք, որ ընտրենք, չունենք այդ մեծ ընտրությունը, որ իրար մոռանանք: Այս մասին ասուլիսի ժամանակ ասաց «Մեր ձևով» շարժման համակարգող Նարեկ Կարապետյանը՝ պատասխանելով այն հարցին, թե արդյոք իրենց քաղաքական ուժի մեջ կլինեն նախկին իշխանության ներկայացուցիչներ, և արդյոք սկզբունքային է իրենց համար նախկին իշխանություններից ներկայացուցիչներ չընդգրկելը:
Անդրադառնալով այն գործիչներին, ովքեր երկարաժամկետ մաս են կազմում այլ քաղաքական ուժերի՝ Կարապետյանը նշեց, որ իրենց դեպքում քիչ է հավանական. «Ավելի շատ կլինեն գործիչներ, ովքեր համակիր ու մասնակից են եղել, բայց ինչ-որ էտապում: Հայաստանում եղած բոլոր կուսակցություններից էլ հնարավոր է, որ ունենանք ներկայացուցիչներ, մենք չենք բաժանում: Տնտեսագետների մոտեցումը քաղաքական գործիքների մոտեցումից լրիվ տարբեր է: Տնտեսագետները գնում են արդյունավետության հետևից: Հայ քաղաքական գործիչների նշանակալի մեծամասնությունը այդպես էլ չհասկացա, թե ինչի հետևից է գնում»:
