«Դա պետք է լինի մեր նպատակը՝ առաջիկա 5 տարվա ընթացքում». Նարեկ Կարապետյանը՝ 300 000 աշխատատեղ ստեղծելու մասին

«Մեր գնահատմամբ՝ աշխատող մարդիկ  բնակչության ոչ միայն կեսը չեն, այլ էապես ավելի քիչ են։ Եթե դիտարկենք մոտ 3 միլիոն բնակչություն ունեցող Հայաստանը, ապա ունենք  800 հազար գրանցված աշխատող, ընդ որում՝  նույն աշխատողը կարող է  գրանցված լինել 2-3 աշխատատեղում։ Բացի այդ, ունենք պետական բյուջեից աշխատավարձ ստացող մոտ 200 հազար մարդ»,- «Շանթ» հեռուստատեսությանը տված հարցազրույցում ասել է «Մեր ձևով» շարժման համակարգող Նարեկ Կարապետյանը։  

Նա նշել է, որ  Հայաստանում կա շուրջ  500 հազար թոշակառու, ինչպես նաև մոտ 300-500 հազար աշակերտ և ուսանող, որոնք դեռ չեն ներգրավված չեն աշխատաշուկայում։

«Այս հաշվարկը մեզ բերում է տրամաբանական եզրակացության․ Հայաստանում մոտ 1.8 միլիոն մարդ կա, ովքեր կամ աշխատում են, կամ օբյեկտիվ պատճառներով չեն կարող աշխատել։ Սակայն միաժամանակ ունենք շուրջ 1.2 միլիոն մարդ, որոնք աշխատաշուկային պատրաստ են, բայց աշխատանք չունեն՝ տնային տնտեսուհիները, գյուղական բնակավայրերի բնակիչները, ովքեր օրն ի բուն աշխատում են գյուղատնտեսության ոլորտում, սակայն չունեն կայուն եկամուտ՝ երկրի թույլ գյուղատնտեսական քաղաքականության հետևանքով։ Մեր համոզմամբ՝ երկրի ակտիվ զարգացման և սոցիալական պարտավորությունները լիարժեք իրականացնելու համար անհրաժեշտ է, որ գործող 800 հազար գրանցված  աշխատող քաղաքացիներին ավելանա ևս առնվազն 300 հազար նոր աշխատատեղ։ Սա պետք է դառնա պետության թիվ մեկ նպատակը՝ առաջիկա 5 տարիների ընթացքում, որպեսզի շուրջ 1.1 միլիոն աշխատող մարդ կարողանա ապահովել 500 հազար թոշակառուի թոշակը և միաժամանակ իր վրա վերցնելով հարկային բեռը՝  որոշակիորեն ապահովել կրթական և սոցիալական ծախսերը»,-ասել է Կարապետյանը։