Ռուսաստանը միակ երկիրն է, որը 1 միլիարդ դոլար է հատկացրել Պաղեստինին. Պեսկովը՝ Խաղաղության խորհրդի մասին

Ռուսաստանն առայժմ մնում է աշխարհում միակ երկիրը, որը որոշում է կայացրել մեկ միլիարդ դոլար հատկացնել Պաղեստինին օգնելու համար։ Այս մասին ճեպազրույցի ժամանակ հայտարարել է Ռուսաստանի նախագահի մամուլի քարտուղար Դմիտրի Պեսկովը։ Պատասխանելով այն հարցին, թե արդյոք Բելառուսը կարող է Խաղաղության խորհրդում ներկայացնել Ռուսաստանի շահերը՝ որպես Միութենական պետության գործընկեր, Պեսկովը նշել է, որ առայժմ դրա անհրաժեշտությունը չկա։

«Տվյալ դեպքում մենք հազիվ թե ունենանք այն բանի կարիքը, որ Մինսկն այնտեղ ներկայացնի մեր շահերը, որովհետև եթե խոսքն իսկապես գնում է Գազայի և պաղեստինյան կարգավորման մասին, ապա այստեղ, թերևս, կարևոր է, որ մինչ օրս Ռուսաստանը մնում է աշխարհում միակ երկիրը, որը որոշում է կայացրել մեկ միլիարդ դոլար հատկացնել Պաղեստինին օգնելու համար, և շատ կարևոր է դա չմոռանալ», – պատասխանել է Պեսկովը։

Խաղաղության խորհրդին մասնակցելու վերաբերյալ Ռուսաստանի դիրքորոշումը դեռևս որոշված չէ, պարզաբանել է Պեսկովը։ Հարցը շարունակում է մշակվել Արտաքին գործերի նախարարության կողմից՝ գործընկերների և դաշնակիցների հետ համատեղ, հայտնում է «Միր 24»-ը:

Բացի այդ, Պեսկովը հայտարարել է, որ Ռուսաստանը չի հրաժարվել դոլարից. դրա օգտագործման սահմանափակումները մտցրել են հենց իրենք՝ ԱՄՆ-ն։

Հիշեցնենք, որ ավելի վաղ ՌԴ ԱԳՆ պաշտոնական ներկայացուցիչ Մարիա Զախարովան հայտարարել էր, որ Ռուսաստանը չի մասնակցի Խաղաղության խորհրդի առաջին նիստին, որը նախաձեռնել է ԱՄՆ նախագահ Դոնալդ Թրամփը։