Մենք միանշանակ հաղթելու ենք ընտրություններում․ «Ուժեղ Հայաստան»
Քաղաքականություն
Ես միանշանակ համոզված եմ, որ մենք ընտրություններում հաղթանակ ենք տանելու։ Այս մասին փետրվարի 17-ին լրագրողների հետ հանդիպմանը հայտարարել է «Հայաստանի էլեկտրական ցանցեր» ՓԲԸ-ի գլխավոր տնօրենի նախկին պաշտոնակատար, «Ուժեղ Հայաստան» կուսակցության վարչության անդամ Դավիթ Ղազինյանը։
Նրա խոսքով՝ խնդիրը որակյալ մեծամասնություն ստանալն է, որպեսզի հնարավոր լինի լուծել «Ուժեղ Հայաստան» կուսակցության վարչապետի թեկնածուի հետ կապված հարցը։ «Մենք չենք դիտարկում այլ սցենար քան որակյալ մեծամասնություն ստանալը», - հավելել է նա։
Ղազինյանը նշել է, որ իշխանություններն իրենց դրսևորում են թույլ դիրքերից, քանի որ ուժեղ իշխանությունն իրեն այդպես չի պահում։ Որպես դրա դրսևորում նա նշել է Ամենայն Հայոց Կաթողիկոս Գարեգին Բ-ի դեմ ներկայացված դատական հայցը, ինչպես նաև հոգևորականների՝ երկրից դուրս գալու արգելքը։ «Ամենավատ երազում դա հնարավոր չէր պատկերացնել։ Ժողովուրդն այս ամենը սկսում է հասկանալ, իսկ այդ պարագայում այլ տարբերակ չկա, կրկնում եմ հունիսի 8-ին չի լինելու այս իշխանությունը։ Այս իշխանությունը լավագույն դեպքում լինելու է ընդդիմություն», - նշել է ընդդիմադիր գործիչը։
