Յոթ արդյունավետ ժողովրդական միջոց ստամոքսի այրոցի բուժման համար

Ստամոքսի այրոցը բավական տարածված խնդիր է, որը դրսևորվում է կոկորդում ու կրծքավանդակում այրոցի զգացողությամբ և պայմանավորված է լինում ստամոքսահյութի՝ կերակրափողում հայտնվելով: Այս տհաճ խնդրին երբևէ բախվել են բոլորը, սակայն ոմանց մոտ այն չափազանց հաճախ է կրկնվում՝ բացասաբար անդրադառնալով կյանքի որակի վրա։

Այրոցից ազատվելու համար գոյություն ունեն հատուկ դեղամիջոցներ, սակայն նման միջոցները ոչ միշտ են բավական արդյունավետ ու անվտանգ լինում, ուստի շատ հաճախ մարդիկ ստիպված են լինում փնտրել խնդրի դեմ պայքարի այլընտրանքային տարբերակներ։ Նման դեպքերում օգնության են հասնում տարածված ժողովրդական միջոցները, որոնք ոչ միայն արդյունավետ են, այլև շատ ավելի հասանելի։

Կոճապղպեղ

Այս բույսը համարվում է մարսողության խանգարումների դեմ պայքարի լավագույն բնական միջոցներից մեկը։ Իր բազմաթիվ օգտակար հատկությունների շնորհիվ այն կարող է հեշտությամբ մեղմել մարսողական այնպիսի խնդիրները, ինչպիսին են փորափքանքը, գաստրիտն ու ստամոքսի արյոցը։ Պարզապես հարկավոր է քերիչով մանրացրած կոճապղպեղին ավելացնել մի բաժակ եռման ջուր, թրմել 10 րոպե, այնուհետև խմել ստացված թուրմը։

Երիցուկով թեյ

Շատ արդյունավետ միջոց է նաև երիցուկով թեյը, որն օգնում է շատ կարճ ժամանակահատվածում ազատվել տհաճ զգացողություններից։ Տաք երիցուկով թեյը հանգստացնող ազդեցություն է ունենում և օգնում է մեղմել այրող ցավը, որը կարող է աստիճանաբար տարածվել, ուստի ստամոքսի այրոցի առաջին իսկ ախտանշանի դեպքում հարկավոր է մի բաժակ երիցուկով թեյ խմել։

Կերակրի սոդա

Կերակրի սոդան կամ նատրիումի բիկարբոնատը նույնպես կարող է նվազեցնել թթվային ռեֆլյուքսի ախտանշանները՝ մեղմելով ստամոքսի այրոցը։ Պարզապես հարկավոր է մի թեյի գդալ սոդան լուծել մի բաժակ ջրում ու խմել։ Այս միջոցն օգնում է ազատվել նաև մարսողության խանգարումից, սակայն հարկ է հիշել, որ այն հարկավոր է զգուշորեն օգտագործել կողմնակի բարդություններից խուսափելու համար։ Բացի այդ, ոչ մի դեպքում չի կարելի օգտագործել այս լուծույթը դատարկ ստամոքսին։

Խնձորի քացախ

Ստամոքսի այրոցի բուժման համար կարելի է կիրառել նաև հասարակ խնձորի քացախ։ Սնվելուց հետո այս մթերքի ջրային լուծույթը խմելը կօգնի հեշտությամբ չեզոքացնել ստամոքսի թթու պարունակությունը և կմեղմի տհաճ զգացողությունները։

Հալվե վերա

Ստամոքսի այրոցի դեմ պայքարի շատ արդյունավետ բնական միջոց է նաև հալվե վերան։ Աղեստամոքսային տրակտում բորբոքումների մակարդակը նվազեցնելու համար հարկավոր է օրական երկու անգամ ուտելուց կես ժամ առաջ կես բաժակ հալվե վերայի թարմ հյութ խմել։

Մաստակ

Որոշ հետազոտություններ ցույց են տվել, որ մաստակ ծամելը նվազեցնում է թթվայնությունը կերակրափողում։ Այն պարունակում է բիկարբոնատ, որն օգնում է ազատվել ստամոքսի այրոցից ու դրա տհաճ ախտանշաններից։ Մաստակի արդյունավետությունը պայմանավորված է նրանով, որ այն խթանում է թքարտադրությունն ու օգնում է մաքրել կերակրափողը ստամոքսահյութից։

Քաղցրարմատ

Այս դեղաբույսը ևս կարող է շատ արդյունավետ լինել ստամոքսի բորբոքային հիվանդությունների դեպքում։ Պարզապես հարկավոր է քաղցրարմատի չորացրած արմատի մի քանի շերտին ավելացնել մի բաժակ տաք ջուր, եռացնել առնվազն հինգ րոպե, այնուհետև թողնել թուրմը սառչի և խմել օրական մեկ անգամ։