«Հայ Վիրտուոզներ» միջազգային ակադեմիա-փառատոնը՝ արդեն 5-րդ օրն է Երևանը վերածել դասական երաժշտության կենդանի կենտրոնի

«Երաժշտություն հանուն ապագայի» հիմնադրամի նախաձեռնությամբ իրականացվող «Հայ Վիրտուոզներ» միջազգային ակադեմիա-փառատոնը արդեն հինգերորդ օրն է, ինչ համախմբում է հայ երիտասարդ տաղանդներին և միջազգային ճանաչում ունեցող երաժիշտներին՝ հաստատելով իր կարևորագույն տեղը տարվա մշակութային իրադարձությունների շարքում։

Այս նախաձեռնության գլխավոր աջակիցն է հանդիսանում Երևանի քաղաքապետարանը, որի աջակցությամբ 70 պատանի երաժիշտներ, որոնք սովորում են Երևանի երաժշտական և արվեստի դպրոցներում, հնարավորություն ստացան մասնակցելու այս ակադեմիային։

Փառատոնը մեկնարկել է մարտի 26-ին՝ Կարեն Դեմիրճյանի անվան մարզահամերգային համալիրում կայացած հանդիսավոր բացման համերգով։ Համերգին հանդես է եկել Երևանի երիտասարդական նվագախումբը՝ բրիտանացի դիրիժոր Փիթեր Սթարկի ղեկավարությամբ, իսկ համերգի մենակատարն է եղել աշխարհահռչակ ֆրանսիացի կլարնետահար Միշել Լեթիեկը, որը այս օրերին Երևանում է և ակադեմիայի պրոֆեսոր է։

Ակադեմիայի հագեցած կրթական ծրագիրն արդեն ընթացքի մեջ է, և արդեն իրականացվել է ավելի քան 200 վարպետության դաս։ Վերջին օրերին վարպետության դասեր են անցկացրել միջազգային ճանաչում ունեցող երաժիշտներ՝ Կորդելիա Հոֆեր (դաշնամուր), Ստանիսլավ Սոլովյով (դաշնամուր), Էսթեր Հաֆֆներ (ջութակ), Սերգեյ Օստրովսկի (ջութակ), Կորյուն Ասատրյան (սաքսոֆոն), Ալեքս Էլիա (շեփոր), Մարիա Կիարա Բինյոցցի (ֆագոտ), Լուիզա Սելլո (ֆլեյտա), Միշել Լեթիեկ (կլարնետ) և Ֆերնանդո Արիաս (հարվածային գործիքներ)։

Վարպետության դասերը անցկացվում են Երևանի մի շարք առաջատար երաժշտական և արվեստի կրթօջախներում՝ Արմեն Տիգրանյանի անվան երաժշտական դպրոցում, Ղազարոս Սարյանի անվան արվեստի դպրոցում, Սայաթ-Նովայի անվան երաժշտական դպրոցում, Ալեքսանդր Սպենդիարյանի անվան երաժշտական դպրոցում և Ալեքսանդր Աճեմյանի անվան երաժշտական դպրոցում, ապահովելով մասնակիցների համար բարձրորակ կրթական միջավայր։

Ակադեմիա-փառատոնի շրջանակում արդեն կայացել են երկու կարևոր պանելային քննարկումներ՝

• «Ո՞վ է հետաքրքրված դասական արվեստով այսօր» – Կերոն հիմնադրամի և «Երաժշտություն հանուն ապագայի» հիմնադրամի համագործակցության շրջանակներում Վերնատանը իրականացված քննարկում, որի ընթացքում անդրադարձ է կատարվել դասական արվեստի ապագային՝ հնչեցնելով տարբեր տեսակետներ և խթանելով երիտասարդների ակտիվ ներգրավվածությունը։
  Բանախոսներ
  Գևորգ Պողոսյան (խոսնակ/մոդերատոր, Keron Development Foundation)
  Աննա Տեր-Հովակիմյան (Talent Pool Program Director, «Երաժշտություն հանուն ապագայի» հիմնադրամ)
  Արթուր Աթայան (Գլխավոր տնօրեն, Hosq Foundation)
  Յաշա Իսրայելևիչ (արտադրական ղեկավար, Talent Pool մասնակից, Հայաստանի պետական սիմֆոնիկ նվագախմբի ֆրանսիական հորնահար)
  Միշել Լեթիեկ (Ֆրանսիացի կլարնետահար)
  
  
• «Երաժշտի կարիերա՝ երազա՞նք, թե՞ իրականություն. գործիքներ և խորհուրդներ» – Մատենա առաջնորդության և մասնագիտական զարգացման միջազգային դպրոցի և հիմնադրամի համագործակցության շրջանակներում կայացած քննարկում, որը ներկայացրեց երաժշտական կարիերայի զարգացման գործնական մոտեցումներ։
  Բանախոսներ
  Լուիզա Սելլո (ֆլեյտա, Իտալիա)
  Կորդելիա Հյոֆեր (դաշնամուր, Ավստրիա)
  Տիգրան Մնացականյան (Matena միջազգային դպրոցի ակադեմիական տնօրեն)
  Ֆերնանդո Արիաս (հարվածային գործիքներ, Իսպանիա)
  Մարտին Ուլիլքանյան (կոմպոզիտոր/արեյջեր, Հայաստան)

Մինչև ապրիլի 4-ը շարունակվող ակադեմիա-փառատոնը միավորել է ավելի քան 130 պատանի երաժիշտների՝ «Երաժշտություն հանուն ապագայի» հիմնադրամի «Հայ Վիրտուոզներ» և «Ծնվել եմ Արցախում» ծրագրերի կրթաթոշակառուներին, ինչպես նաև Երևանի երաժշտական և արվեստի դպրոցների սաներին։ Ծրագրի ընթացքում նախատեսված է շուրջ 350 վարպետության դաս՝ աշխարհի տարբեր երկրներից ժամանած մոտ 20 անվանի արտիստների մասնակցությամբ։

Նշում․ Այս մամլո հաղորդագրությունը տարածվում է «Երաժշտություն հանուն ապագայի» հիմնադրամի կողմից։