Թուրք-ադրբեջանական ծաղր՝ Հայոց ցեղասպանությանը

Մինչ փաշինյանակա իշխանությունն իրեն հույս է տալիս, թե խաղաղություն է կառուցում Թուրքիայի և Ադրբեջանի հետ, այդ երկրներից հնչած հայտարարությունները փաստում են տարրական այն ճշմարտությունը, որ «թուրքի հետ խաղաղ ապրելն անհնար է»․ Թուրքիայի պաշտպանության նախարարությունը սոցցանցերում անդրադարձել է 1915 թվականի իրադարձություններին՝ ոչ միայն ժխտելով Հայոց ցեղասպանության փաստը, այլև հայերին մեղադրելով «զանգվածային սպանությունների համար»։

«Մենք ողորմածությամբ հիշում ենք այն անպաշտպան և անմեղ թուրքերին, որոնք անողոք կերպով կոտորվեցին հայերի կողմից 1915 թվականի իրադարձությունների ժամանակ»,- նշված է Թուրքիայի ազգային պաշտպանության նախարարության X-ի օգտահաշվում։

111 տարի անց պաշտոնական Անկարան չի ընդունում և մերժում է Ցեղասպանության իրողությունը: Շատ ավելի լկտի հայտարարություն է տարածել Ադրբեջանի արտաքին գործերի նախարարությունը՝ խստորեն դատապարտելով ապրիլի 23-ին Երևանում կայացած ջահերով երթի ժամանակ Թուրքիայի դրոշի այրումը։ Բաքուն շեշտել է, թե Հայաստանի կառավարությունը պետք է ձեռնարկեր համապատասխան անվտանգության միջոցառումներ, անհապաղ կանխեր նման արշավը, որը «խորը արմատացած էթնիկ ատելության դրսևորում» է Ադրբեջանը որակել:

ՀՅԴ-ի կազմակերպած ջահերով երթի մեկնարկին այս տարի ևս այրվեց Թուրքիայի դրոշը: Ի դեպ, Նիկոլ Փաշինյանի դիրքորոշումը որևէ կերպ չի տարբերում Ադրբեջանի տեսակետից։ Նա ակնհայտորեն սադրիչ և լարվածություն հրահրող վարքագիծ է որակել Երևանում ջահերով երթի մասնակիցների կողմից Թուրքիայի դրոշի այրումը։ Նա դատապարտել է նման գործելակերպը՝ այն գնահատելով որպես անպատասխանատու և անթույլատրելի։ Ու դժվար էլ այս տարի պատասխանեն Ադրբեջանին։ Մինչդեռ, կարող էր հայտարարել, թե Հայաստանը, ի տարբերություն Ադրբեջանի, ժողովրդավար երկիր է, որտեղ յուրաքանչյուրը կարող է արտահայտել իր դիրքորոշումը։