Ի՞նչ է փնտրում Ադրբեջանի փոխվարչապետը Երևանում

Այսօր վաղ առավոտյան «Զվարթնոց» օդանավակայանում վայրէջք է կատարել ադրբեջանական օդանավ։ Քաղաքացիական ավիացիայի կոմիտեից հայտնել են, որ ինքնաթիռով ադրբեջանական պատվիրակություն է ժամանել Երևան, բայց այլ մանրամասներ չեն հայտնել։ Ավելի ուշ ադրբեջանական լրատվամիջոցները տեղեկացրել են, որ Ադրբեջանի պատվիրակությունը՝ փոխվարչապետ Շահին Մուստաֆաևի գլխավորությամբ, ժամանել է Երևան։ Մուստաֆաևը Մհեր Գրիգորյանի հետ միասին Ադրբեջանի և Հայաստանի միջև պետական սահմանի սահմանազատման պետական հանձնաժողովի համանախագահն է։

Բայց ոչ հայկական, ոչ ադրբեջանական կողմերը պաշտոնական տեղեկություններ չեն տալիս, թե ինչու է Մուստաֆաևը ժամանել Երևան և ինչ հարցեր պետք է քննարկեն։ Ամենայն հավանականությամբ, դրանք կապված են սահմանազատման և սահմանագծման հարցի հետ։ Տևական ժամանակ՝ Տավուշի մարզում սահմանազատում և սահմանագծում իրականացնելուց հետո, այդ գործընթացը դանդաղել և կանգ էր առել, թեպետ հայկական կողմը պարբերաբար հայտարարում էր, թե սահմանազատումը շարունակվելու է։ Ըստ ամենայնի, հենց այդ հարցերն էլ կքննարկեն։

Ի դեպ, տեղեկություններ կան, որ Մուստաֆաևին կարող է ընդունել նաև Նիկոլ Փաշինյանը։ Ադրբեջանի փոխվարչապետը ծնվել է Հայաստանում, դպրոց և բուհ գնացել հենց Հայաստանի տարածքում և հրաշալի տիրապետում է հայերենին, բայց և, բնականաբար, չափազանց լավ է առաջ մղում Ադրբեջանի շահերը, ի տարբերություն հայկական կողմի ներկայացուցիչների, որոնք ձախողում են Հայաստանի շահերը առաջ մղելու գործընթացը։

Սոնա Գալստյան