Փաշինյանը փորձում է ընդդիմությանը պատրադրել իր կեղտոտ խաղը

Նախընտրական քարոզչության փուլում գործող իշխանության մարտավարությունը պարզ է և, հանուն արդարության պետք է նշել, բավականին արդյունավետ։ Մասնավորապես, Փաշինյանը հենց սկզբից անցել է հարձակողական մարտավարության՝ վիրավորանքներով, ընտանիք մտնելով, անվանարկելով, փորձելով ընդդիմությանը ներքաշել իր օրակարգի դաշտ։ Բայց այս մարտավարությունը միայն վիրավորանքը չէ, որ ներառում է։ Փաշինյանը իր կողմնակիցների հետ նաև փորձում է ծաղրել ընդդիմությանը։ Երեկ օրինակ, հերթական անգամ «ուրախ ավտոբուսում» զբաղվելով իր սիրելի գործով՝ իքիբիր ուտելով, Փաշինյանը դիմել է կողքին նստած ԱԺ նախագահին. «Իքիբիր ասեցիր՝ ընդդիմությանը հիշեցի. դրանք խի՞ են տենց պասիվ»,- հարցնում է Փաշինյանը։ Ի պատասխան, ԱԺ նախագահը ասում է՝ «Չեն կարող խաղան»։

Այն, որ գործող իշխանություններն ամեն ինչ փորձում են անել, որպեսզի ընդդիմությունը խաղա իրենց կանոններով, գաղտնիք չէ։ Իսկ Փաշինյանի այս հակահիգիենիկ և հակաէսթետիկ պահվածքն ընդամենը փաստում է նրա վախերի գոյության մասին։ Իսկ նրան հնարավոր է հաղթել մի դեպքում, եթե ընդդիմությունը չխաղա Փաշինյանի կանոններով, այլ ինքը օրակարգ ստեղծի։ Ցավոք, մինչ այս պահը դեռևս հանրային օրակարգ ստեղծելու հարցում իշխանությունն ավելի ակտիվ է գործում, քան ընդդիմադիր քաղաքական ուժերը, որոնք, հարկ է, փոխեն իրենց մարտավարությունը և ավելի արդյունավետ պայքար մղեն գործող իշխանությունների դեմ՝ Փաշինյանին զրկելով վիրավորանքներով և ծաղրով հանրային դաշտը լցնելու հնարավորությունից։

Սոնա Գալստյան