Եվրահանձնաժողով բողոք են ներկայացրել TikTok-ի դեմ
Ապրելակերպ
Սպառողների իրավունքների պաշտպանության եվրոպական կազմակերպությունը (BEUC) Եվրահանձնաժողով բողոք է ներկայացրել TikTok սոցցանցի դեմ՝ նրան մեղադրելով օգտատերերի իրավունքների խախտման մեջ: Այս մասին նշված է կազմակերպության հայտարարության մեջ, փոխանցում է ՏԱՍՍ-ը:
BEUC-ի կարծիքով՝ սոցցանցն անչափահասներին չի պաշտպանում վտանգավոր կոնտենտից, ինչպես նաեւ մի շարք հարցերով մոլորության մեջ է գցում: «TikTok-ը չի կարող իր հարթակում երեխաներին եւ դեռահասներին պաշտպանել թաքնված սպառնալիքներից, գովազդից եւ պոտենցիալ վնասակար կոնտենտից: BEUC-ը եւ նրա անդամները հանդես են գալիս TikTok-ի քաղաքականության եւ գործողությունների բազմակողմանի քննությամբ, որ ԵՄ-ում ապահովվի սպառողների իրավունքների պաշտպանությունը»,- նշված է փաստաթղթում:
Ավելին՝ կազմակերպությունն անարդարացի է համարում օգտատերերի նկարահանած տեսանյութերի հեղինակային իրավունքի ոլորտում սոցցանցի քաղաքականությունը: «Հեղինակային իրավունքի պայմանները նույնքան անարդարացի են, քանի որ TikTok-ին անվերադարձ իրավունք են տալիս օգտատերերի նկարահանած տեսանյութերն օգտագործել, տարածել եւ վերարտադրել առանց որեւէ վարձատրության»,- ընդգծված է փաստաթղթում:
