Բեռլինում երկու հակառակորդ հանցավոր կլանների դեմ ռեյդեր են անցկացվել

Հարյուրավոր գերմանացի ոստիկաններ մասնակցել են երկու հակառակորդ հանցավոր կլանների դեմ ռեյդերին, հայտնում է AP-ն:

Բեռլինի դատախազությունը Twitter-ում գրել է, որ երկու մարդ է ձերբակալվել թմրանյութերի եւ զենքի ապօրինի շրջանառության դեմ ռեյդերի ընթացքում:

Բացի այդ, իշխանությունները հետաքննում են անցյալ տարվա նոյեմբերին արաբական եւ չեչենական կազմակերպված հանցավոր «կլանների բախման» հետ կապված մարմնական վնասվածք հասցնելու մեղադրանքները, հայտնել է դատախազությունը: Այդ ժամանակ երկու խմբավորումների միջեւ տեղի էին ունեցել մի քանի դաժան բախումներ:

Bild-ը հայտնել է, որ ռեյդերի թիրախներից մեկը Ռեմմո ընտանիքն էր, որը ենթադրաբար կապված է ոչ վաղ անցյալում երկու հետաքրքրիր կողոպուտների հետ:

Անցյալ տարի Դրեզդենի թանգարանից 18-րդ դարի թանկարժեք իրերի գողության գլխավոր կասկածյալներից երկուսը Բեյրութի հետ կապեր ունեցող կլանի անդամներ են:

21-ամյա Մոհամմեդ Ռեմմոն Բեռլինի իշխանությունների կողմից ձերբակալվել էր դեկտեմբերին՝ «Կանաչ պահուստ» թանգարանում գողություն կատարելու կապակցությամբ, մինչդեռ նրա երկվորյակ եղբայր Աբդուլ Մաջեդ Ռեմոն միջազգային հետախուզման մեջ է:

Անցյալ տարի Ռեմմո ընտանիքի մյուս անդամները դատապարտվել էին նույնքան աղմկահարույց կողոպուտի՝ 2017-ին Բեռլինի Բոդե թանգարանից 100 կգ-անոց կանադական «Մեծ թխկու տերեւ» անվանմամբ ոսկե մետաղադրամ գողանալու համար:

3,75 միլիոն եվրո գնահատված մետաղադրամը այդպես էլ չի գտնվել, եւ իշխանությունները կարծում են, որ այն, ամենայն հավանականությամբ, բաժանվել է ավելի փոքր կտորների եւ վաճառվել է: