Մահապատժի՛ ենթարկել Հայաստանի անկախությունն ու ինքնիշխանությունը վաճառողներին. Խաչիկ Ասրյան

«Հայոց Արծիվներ. Միասնական Հայաստան» կուսակցության նախագահ Խաչիկ Ասրյանը ֆեյբուքյան իր էջում գրել է․

Հայաստանի անկախությունն ու ինքնիշխանությունը յուրաքանչյուր Հայի համար բացարձակ արժեքներ են՝ նույնքան սուրբ և անսակարկելի, որքան ծնողը, ընտանիքը և Հայրենիքը։

Անհրաժեշտության դեպքում Հայաստանի անկախությունն ու ինքնիշխանությունը պետք է պաշտպանել անգամ կյանքի գնով, այլ ոչ թե այն վաճառել օտար պետություններին` ծառայի, ստրուկի, լրտեսի, դավաճանի կարգավիճակով անձնական բարեկեցություն և կարիերա ապահովելու նպատակով։

Ցանկացած պետության ազգային և պետական շահը յուրաքանչյուր Հայի համար պետք է ավարտվի այնտեղ, որտեղ սկսվում է մեր Սուրբ Հայաստանի ազգային և պետական շահը։ Հայաստանի թե՛ իշխանությունը, թե՛ քաղաքական ընդդիմությունը մշտապես պետք է առաջնորդվեն Հայոց պետության պահպանման, պաշտպանության և հզորացման գաղափարախոսությամբ՝ կրելով բացառիկ պատասխանատվություն Հայ ժողովրդի և Հայոց պետության առջև:

Հայաստանի անկախությունն ու ինքնիշխանությունը վաճառողները չեն կարող և չպետք է ընկալվեն որպես սովորական հանցագործներ։ Նրանց գործողությունները հարված են պետության գոյությանը, ազգային անվտանգությանը և սերունդների ապագային։

 

Հայաստանի անկախությունն ու ինքնիշխանությունը վաճառողներին պետք է դատել առավելագույն խստությամբ և անզիջում կերպով։

Այն հայը, ով կծառայի օտար պետության շահերին և կփորձի վաճառել Հայաստանի անկախությունն ու ինքնիշխանությունը, որպես Հայրենիքի դավաճան և պետական հանցագործ, պետք է ենթարկել մահապատժի՝ հանուն Հայոց պետության պահպանման, ազգային անվտանգության ապահովման, սերունդների ապագայի, ասել է թե՝ հզոր և արժանապատիվ Հայաստանի (վերականգնել մահապատիժը)։

Խաչիկ Ասրյան

 

1992–1994 թվականներին՝ 30 հոգանոց իր քաջերի ջոկատով, հերոս Գնդապետ Ռեմիկ Մարդանյանի հրամանատարության ներքո, Արցախյան պատերազմին կամավոր մասնակցած (Քաշաթաղի (Լաչինի) հարավ-արևելյան շրջան),

 

2016 թվականի ապրիլի 3-ից մինչև ապրիլի 29-ը՝ 60 հոգանոց իր քաջերի ջոկատով, ՀՀ ՊՆ 1-ին բանակային կորպուսի հերոս հրամանատարության ներքո, Ապրիլյան պատերազմին կամավոր մասնակցած (Արցախ, Ջրական (Ջաբրայիլ),

2020 թվականի սեպտեմբերի 29-ից մինչև հոկտեմբերի 29-ը՝ 100 հոգանոց իր քաջերի ջոկատով, ԱՀ ՊԲ Մարտունի 2 պաշտպանական շրջանի հերոս հրամանատարության ներքո, 44-օրյա պատերազմին կամավոր մասնակցած և իր քաջերի ջոկատով Արցախի Մարտունի և Ճարտար քաղաքներն ու հարակից գյուղերը պաշտպանած և անառիկ պահած,

«Մարտական Խաչ» 1-ին աստիճանի շքանշանակիր,

 

«Հայոց Արծիվներ» կամավորական մարտական ջոկատի Հրամանատար,

 

«Սյունյաց Արծիվներ» և «Հայոց Արծիվներ» հայրենասիրական հասարակական կազմակերպությունների հիմնադիր Նախագահ,

 

«Հայոց Արծիվներ․ Միասնական Հայաստան» կուսակցության Նախագահ,

2007–2018 թվականներին՝ ազնիվ ու անբասիր կերպով ՀՀ Սպորտի և Երիտասարդության հարցերի փոխնախարար աշխատած,

Պահեստազորի Գնդապետ։

 

Պարգևատրվել է 42 մեդալով (հուշամեդալ, շքանշան, կրծքանշան, կոչում) և 270-ից ավել պատվոգրով ու շնորհակալագրով։