82 տարեկանում կյանքից հեռացել է դերասան Մայքլ Բիրնը, ով առավել հայտնի է «Հարրի Փոթեր» և «Ինդիանա Ջոնս» ֆիլմերից

82 տարեկանում կյանքից հեռացել է բրիտանացի դերասան Մայքլ Բիրնը, որը, հատկապես, հայտնի է «Ինդիանա Ջոնսը և վերջին խաչակրաց արշավանքը» և «Հարրի Փոթերը և մահվան պարգևները՝ մաս 1» ֆիլմերում իր դերերով, գրում է Page Six-ը։ Ըստ The Guardian-ի, Բիրնը մահացել է հունիսի 20-ին։

Նրա մահվան պատճառը չի բացահայտվել։

Բիրնը, որը ծնվել է Լոնդոնում՝ 1943 թվականի նոյեմբերի 7-ին, ունեցել է բեղուն դերասանական կարիերա, որը տևել է գրեթե 60 տարի։

Նրա առաջին դերերը բեմում եղել են 1963 թվականին՝ Լոնդոնի Օլդ Վիկ թատրոնում։

Բիրնը իր կինոդեբյուտը կատարել է 1963 թվականի «Կարմիր շեղբը» ֆիլմում, որին հաջորդել են դերերը «Բաթլի», «Արծիվը վայրէջք է կատարել», «Հենրի VIII-ը և նրա վեց կանայք», «Մեդուզայի հպումը» և «Լավ հայրը» ֆիլմերում։

1989 թվականին նա խաղացել է նացիստ գնդապետ Էռնստ Վոգելի դերը Հարիսոն Ֆորդի մասնակցությամբ «Ինդիանա Ջոնս»-ի 3-րդ մասում։

2010 թվականին նա մարմնավորել է մութ կախարդ Գելլերտ Գրինդելվալդին «Հարրի Փոթերը և մահվան պարգևները. Մաս 1» ֆիլմում։

Երեք տարի անց նա խաղացել է հարավաֆրիկացի սրտային վիրաբույժ Քրիստիան Բարնարդի դերը՝ «Դիանա» ֆիլմում, որում Ուելսի հանգուցյալ արքայադստերը մարմնավորում էր Նաոմի Ուոթսը։

IMDb-ի տվյալներով՝ նրա վերջին դերասանական խաղը եղել է վեց մասից բաղկացած «Ֆեբուսյան գործերը» կատակերգական-դրամա սերիալում՝ 2023 թվականին։