Երեք ամիս անց սպառնալիքները ոչ միայն չեն դադարել, այլ՝ ավելի են ահագնացել
Քաղաքականություն
Ամիսներ առաջ գրել էինք .
2018 թվականի հեղափոխությունից հետո գործարար շրջանակների մի մասը սպասում էր, որ բիզնես միջավայրում կձևավորվեն հավասար մրցակցային պայմաններ և կվերանան նախկինում քննադատվող արտոնյալ համակարգերը։ Սակայն որոշ գործարարներ պնդում են, որ իրենց համար իրականությունը եղել է հակառակը։
Նրանց ներկայացմամբ՝ նախկին օլիգարխիկ համակարգի փոխարեն սկսեց ձևավորվել նոր ազդեցության կենտրոն, որի առանցքային ներկայացուցիչներից մեկը դարձավ գործարար Նարեկ Նալբանդյանը։ Հրապարակված տարբեր գնահատականների համաձայն՝ վերջինս կարճ ժամանակում դարձավ մի շարք խոշոր ակտիվների սեփականատեր՝ այդ թվում Եղվարդի կերերի գործարանի, ինչպես նաև կառավարության կողմից սեփականաշնորհված «Գոլդեն Պալաս» հյուրանոցի, որը, քննադատների պնդմամբ, ձեռք է բերվել առանձնահատուկ պայմաններով։ Նույն աղբյուրների փոխանցմամբ՝ հետագայում նա սկսել է ազդեցություն գործադրել նաև առևտրային խոշոր ցանցերի նկատմամբ։
Այս համատեքստում հիշատակվում է նաև վարչապետ Նիկոլ Փաշինյանի տիկին Աննա Հակոբյանի հիմնադրած «Իմ քայլը» հիմնադրամը։ Որոշ գործարարների պնդմամբ՝ հիմնադրամի կազմակերպած բարձրարժեք բարեգործական ընթրիքներին մասնակցելուց հրաժարվելուց հետո իրենք հայտնվել են այսպես կոչված «սև ցուցակում», ինչից հետո իրենց նկատմամբ սկսվել են տարբեր ճնշումներ։ Այս պնդումները պաշտոնապես չեն հաստատվել։
Ըստ հրապարակված տեղեկությունների՝ առաջին թիրախներից են եղել «Օազիս» և «Ծիրան» սուպերմարկետների ցանցերը։ Գործարարների ներկայացմամբ՝ սկզբում սկսվել են հարկային և վարչական լայնածավալ ստուգումներ, այնուհետև՝ այլ պետական մարմինների վերահսկողական գործողություններ։
«Ծիրան» սուպերմարկետների ցանցի սեփականատեր Արամ Հարությունյանը ավելի վաղ մեր հետ զրույցում չէր հերքել, որ իր և իր ընտանիքի հասցեին սպառնալիքներ են հնչել։ Նրա խոսքով՝ սպառնալիքներ են ստացել նաև իր մայրը՝ Ալվարդ Թունյանը, իսկ այդ կապակցությամբ համապատասխան հաղորդում է ներկայացվել Երևանի Կենտրոն վարչական շրջանի ոստիկանություն։
Արամ Հարությունյանը նշել էր, որ մոր նկատմամբ հնչող սպառնալիքները դիտարկում է որպես ճնշում ամբողջ ընտանիքի նկատմամբ։ Նրա խոսքով՝ դիմել են նաև Մարդու իրավունքների պաշտպանի գրասենյակ, որտեղ պատասխանել են, որ մինչև ոստիկանության կողմից քննության ավարտը չեն կարող միջամտել գործընթացին։ Միաժամանակ գործարարը դժգոհել էր, որ, իր գնահատմամբ, ոստիկանությունը գործին պատշաճ ընթացք չի տալիս։
Երեք ամիս անց իրավիճակը, ըստ ընտանիքի, ոչ միայն չի բարելավվել, այլ ավելի է սրվել։
Մեզ հասած նոր տեղեկությունների համաձայն՝ Ալվարդ Թունյանի նկատմամբ հնչող սպառնալիքները ոչ միայն չեն դադարել, այլև զգալիորեն ահագնացել են։ Ընտանիքի պնդմամբ՝ եթե նախկինում սպառնալիքները եղել են պարբերական, ապա վերջին երեք ամիսների ընթացքում դրանք դարձել են ավելի հաճախակի և ավելի կոշտ բովանդակությամբ։
Ընտանիքի ներկայացուցիչները նշում են, որ ստեղծված իրավիճակը լուրջ մտահոգություններ է առաջացնում ոչ միայն Ալվարդ Թունյանի, այլև ամբողջ ընտանիքի անվտանգության առումով։ Նրանք պնդում են, որ մինչ օրս չեն տեսնում իրավապահ մարմինների արդյունավետ արձագանքը և ակնկալում են, որ գործի քննությունը կստանա անհրաժեշտ ընթացք, իսկ սպառնալիքների հեղինակները կհայտնաբերվեն և կենթարկվեն պատասխանատվության։
Միևնույն ժամանակ, հրապարակված տեղեկությունների համաձայն, մարզերում գործող մի շարք խոշոր առևտրային օբյեկտների սեփականատերեր ևս դժգոհում են իրենց նկատմամբ իրականացվող ճնշումներից՝ պնդելով, որ բիզնես միջավայրում շարունակում է պահպանվել անհավասար մրցակցությունը և ազդեցության լծակների կիրառումը։
