Պուտինի ու Ալիեւի հույսը Փաշինյանն է․ մյուսները հերթում
ՀասարակությունԼիտվայում հայ համայնքի հետ հանդիպմանը Նիկոլ Փաշինյանը կրկնել է խաղաղ դարաշրջան բացելու, ականապատ տարածքների քարտեզները գերիների հետ փոխանակելու, Ալիեւի հետ հանդիպելու պատրաստակամության ու Մինսկի խմբում հումանիտար հարցերը կարգավորելու իր «բանաձեւերը»։ Նրա ԱԽ քարտուղարն էլ ասել էր, թե իրենք միջանցքներ են ասում, մենք ճանապարհներ, ինչ տարբերություն։
Ռուսաստանի անորոշ ապագայի ու հայկական ռեւանշի հնարավորությունից Ալիեւի սարսափների պայմաններում Մոսկվան ու թուրքերը շտապում են Կարս-2-ի հարցում։ Արեւմուտքը շարունակում է պնդել Մինսկի խմբում քաղաքական կարգավորման ու կարգավիճակի հարցերը, Իրանը զգուշացնում է Հայաստանի հարավում «միջանցքներ բացելու» ռուս-թուրքական ծրագրերի հարցով՝ լայնածավալ զորաշարժեր իրականացնելով Արաքսի ողջ երկայնքով։ ԱՄՆ Ներկայացուցիչների պալատն ու ԵԽԽՎ-ն հետաքննություն են սկսում պատերազմական հանցագործությունների հարցում։
ՀՀ իշխող խմբակն անդրդվելի է։ Նրանից հետ չեն մնում խորհրդարան անցած «ընդդիմադիր» դաշինքները։ Հայաստան դաշինքը ողջունեց ՄԱԿ ամբիոնից Նիկոլ Փաշինյանի երդումները Մոսկվային ու եռակողմ հայտարարությանը, Սերժ Սարգսյանն էլ ՀՀԿ հավաքում երաշխիքներ տվեց՝ ինչ պատերազմ, ինչ ռեւանշ, բանակը ջախջախված է, շուտ չի վերականգնվի, պետություն չկա եւ այլն, Արցախի հարցում էլ քիչ թե շատ ընդունելի լուծում կլինի։
Արեւմուտքի ու Իրանի համառության պայմաններում Պուտինի ու Ալիեւի հույսը Նիկոլ Փաշինյանն ու եռակողմ հայտարարությանը հավատարմության հիմքով խորհրդարան անցած ուժերն են՝ Արցախի կարգավիճակի ու Հայաստանի ինքնիշխանության վերացման ռուս-թուրքական համաձայնությունները «լեգիտիմացնելու», Հայաստանի դեմ ահաբեկչական պատերազմի ու ռազմական հանցագործությունների համար պատասխանատվությունից խուսափելու հարցում։ Նոյեմբերի 9-ից ի վեր ներքաղաքական «բանավեճն» ու քարոզչությունը Հայաստանի դեմ հիբրիդային պատերազմի տարրերից մեկն էր՝ հանրության շրջանում անելանելիության ու հուսալքության զգացումն արմատավորելու, «խաղաղ դարաշրջանին ու արժամապատիվ խաղաղությանը» համակերպելու նպատակով։