ՀՀ էկոնոմիկայի նախարարն այցելել է «Սպայկա» ընկերություն
Քաղաքականություն
Հայաստանի Հանրապետության Էկոնոմիկայի նախարար Գևորգ Պապոյանն այցելել է «Սպայկա» ընկերություն՝ ջերմատնային պայմաններում կակաչների արտադրությանը ծանոթանալու նպատակով: Նախարարի հետ ընկերություն է այցելել նաև ՀՀ-ում Նիդեռլանդների Թագավորության արտակարգ և լիազոր դեսպան Մարիկե Հարիետ Մոնրոյ-Վինթերը։
«Ջերմատնային տնտեսության տարածքն, ընդհանուր առմամբ, կազմում է 67 հա, արտադրանքն արտահանվում է միջազգային շուկա, արտադրության ծավալները տարեց տարի ավելանում են․ եթե 2023 թվականին այստեղ կարողանում էին աճեցնել 9 մլն հատ կակաչ, ապա 2024 թվականին արտադրական ծավալներն աճել են՝ հասնելով 17 մլն հատի։ Այս տարի արդեն իսկ պլանավորվում է աճեցնել 37 մլն հատ կակաչ, որը նույնպես նախատեսվում է ամբողջապես արտահանել։ Ընկերությունն ունի շուրջ 2500 աշխատակից»,- «Ֆեյսբուք»-ի իր էջում գրել է Էկոնոմիկայի նախարարը:
Բազմացման նպատակով կակաչի սոխուկները ընկերությունը ներկրում է արտերկրից։
Շրջայցի ընթացքում Գևորգ Պապոյանը ծանոթացել է ընկերության արտադրական կարողություններին, այցելեցի նաև նորաբաց ջերմատուն, որը զբաղեցնում է 12 հա տարածք։
