Նոր կերպարներ ու մեծ չափաբաժնով հումոր. «Ժիրո-Իվան» սիթքոմի 2-րդ եթերաշրջանը մեկնարկել է
Ֆոտո
Արմենիա հեռուստաընկերության եթերում մեկնարկել է «Ժիրո-Իվան» սիթքոմի 2-րդ եթերաշրջանը՝ նոր դեմքերով ու զարգացումներով:
Սիթքոմի նոր եթերաշրջանը զգալիորեն տարբերվում է առաջինից․ զարգացվել են ինչպես կերպարային գծերը, այնպես էլ սյուժետային լուծումները։ Նախագծին միացել են նոր դերասաններ, որոնք իրենց կերպարներով բերել են թարմ հումորային շերտեր։
Tert.am Life-ը ներկա է եղել նկարահանումներին, զրուցել դերասանների հետ և առանձնացրել հետաքրքիր դրվագները:
Դերասան Լեռնիկ Հարությունյանը նշում է.
«Այս եթերաշրջանում կերպարներն ու պատմական գծերը ավելի խորացված են։ Նոր հերոսները սիթքոմին տվել են լրացուցիչ դրական էներգիա և հումոր։ Սիթքոմը նաև ունի կարևոր ենթատեքստ՝ 2 եղբայրների միջև չպետք է լինի կռիվ»:
Դերասանուհի Նինա Տիտանյանը, խոսելով իր՝ Ալվարդի կերպարից, նշեց․
«Ալվարդն այս անգամ առավել տաքարյուն է ու ակտիվ։ Կերպարիս շուրջ շատ նոր ու հետաքրքիր զարգացումներ կան։ Հումորը մեծ չափաբաժնով է լինելու, և վստահ եմ՝ հեռուստադիտողը հաճույքով կդիտի այն»:
Նախագծի պրոդյուսեր Ռաֆայել Ղազանչյանի խոսքով՝ հանդիսատեսի բարձր գնահատականը պատճառ դարձավ, որ նախագիծը ունենա շարունակություն.
«Առաջին եթերաշրջանի դիտումները գերազանցեցին սպասվածը, արձագանքները շատ դրական էին։ Այդ պատճառով էլ որոշվեց նկարահանել երկրորդ եթերաշրջանը։ Այս անգամ ներկայացվում են նաև նոր կերպարներ՝ Ժիրոյի կինը, ինչպես նաև Ժիրոյի և Իվանի հայրը՝ երիտասարդ կնոջ հետ։ Թեման շարունակում է մնալ ընտանիքի, եղբայրական հարաբերությունների ու առօրյա կյանքից վերցրած իրավիճակների շուրջ»:
Իրավիճակային հումորը սիթքոմում հաճախ ծնվում է նաև նկարահանման հրապարակում։ Դերասան Վաչե Երիցյանը հիշում է նկարահանման մի հետաքրքիր դրվագ.
«Մի տեսարանի ժամանակ պետք է բուտաֆոր նարնջով հարված անեի, բայց ձեռքիս տակ իսկականն էր ընկել, ու բաժակները կոտրվեցին։ Բայց ոչ ոք չկանգնեցրեց՝ այդպես էլ անցավ տեսարանը»:
Վաչե Երիցյանը հավելեց, որ նախագիծն առանձնանում է իր ուրույն, ջերմ և ընկերական նկարահանման մթնոլորտով․
«Սիթքոմը գունավոր է, ծիծաղահարույց ու իսկապես ժամանցային։ Եվ ես ուրախ եմ, որ դրա մի մասն եմ»,- ամփոփեց դերասանը:
