Ապագայի աչքերը. ստեղծվել է խելացի լինզա, որը թույլ է տալիս վերականգնել տեսողությունը
ՀասարակությունԱպագայի տեխնոլոգիաները ստեղծվում են ոչ միայն ցույց տալու համար, թե որքան հեռու կարող է մարդկությունը գնալ: Բազմաթիվ հայտնագործություններ ուղղված են մարդկանց կյանքի ու առողջության բարելավմանը: Բելգիացի գիտնականները մշակել են լինզաների նոր տեսակ, որն ունակ է վերականգնելու տեսողությունը:
Բելգիայի «Imec» ինովացիոն կենտրոնը ակտիվորեն աշխատում է նոր նախագծի վրա, ինչի համար միավորել է մի շարք բարձր տեխնոլոգիաներ: Արդյունքում ստեղծվել է աչքերի համար նախատեսված լինզայի նախատիպ, որն ունակ է անելու անհնարինը՝ ուղղումներ կատարել այն լույսի վրա, որն ընկնում է աչքի ցանցաթաղանթին: Սա կարող է օգնել միլիոնավոր մարդկանց, որոնք տառապում են հեռատեսությամբ և կարճատեսությամբ: Հնարավոր է, որ ապագայում, շնորհիվ այս լինզաների, աշխարհում տեսողական խնդիրներ ունեցող մարդիկ ավելի քիչ լինեն:
Այսօր տեսողական խնդիրները չափազանց տարածված են: Վատ տեսողություն ու նմանատիպ խնդիրներ ունեն միլիոնավոր մարդիկ աշխարհում: Հենց այդ պատճառով էլ հարկավոր է ակտիվորեն աշխատել խնդրի ինովացիոն լուծում գտնելու ուղղությամբ:
«Imec» կենտրոնի գիտաշխատողները վստահեցնում են, որ գտել են ունիվերսալ և արդյունավետ լուծում, որը կկարողանա շտկել տեսողությունը: Տեսողական հիվանդություններից շատերի դեպքում խնդիրն այն է, որ ծիածանաթաղանթը չի կարողանում ճիշտ արձագանքել լուսային փոփոխություններին: Եթե լույսը շատ է, ապա աչքերի առջև ամեն ինչ մշուշոտ է լինում, իսկ եթե հակառակը՝ լույսը քիչ է, շուրջբոլորը խավար է լինում:
Խելացի լինզան հեղուկ-բյուրեղային դիսպլեյ ունի, ինչպես նաև ներկառուցված միկրոչիպ, լուսային դիոդ և մալուխ: Դրա օգնությամբ մարդը կարող է առավել պարզ տեսնել ամեն ինչ: Լինզան թույլ կտա նաև առանց այն հեռացնելու դեղեր օգտագործել և ախտորոշում իրականացնել: Այն ճկուն և փափուկ է, պատրաստված է հիդրոգելից և թթվածնի թափանցելիության բարձր մակարդակ ունի, այդ իսկ պատճառով այն շատ հեշտ կլինի կրելը:
Լինզան մարդը կարող է օգտագործել ողջ օրվա ընթացքում, և ոչ մի գրգռում չի առաջանա: Կլինիկական փորձարկումներ նախատեսում են անցկացնել մոտ ապագայում: