Դեղերի գների նվազումը չի սահմանափակվի 20 տոկոսով․ որոշ դեղերի գներ կարող են նվազել մինչև 50 տոկոսով․ Նարեկ Կարապետյան
Քաղաքականություն
«Սամվել Կարապետյանի տնտեսական 5 քայլերից մեկը դեղորայքի 20 տոկոս էժանացումն է։ Մեր գնահատմամբ՝ Վրաստանի փորձն այստեղ ամբողջությամբ կիրառելի է»,-«Շանթ» հեռուստատեսությանը տված հարցազրույցում ասել է «Մեր Ձևով» շարժման համակարգող Նարեկ Կարապետյանը։
«Տարածաշրջանում, կարելի է ասել, որ ամենաթանկ երկիրը Հայաստանն է, բայց ոչ այն պատճառով, որ շրջափակման մեջ է գտնվում, ինչպես ասում են, այլ որովհետև մեր շուկան լիարժեք ազատականացված չէ։ Հայաստանում դեղերի ներմուծման համար գործում է առանձին թույլտվությունների և գրանցման համակարգ։ Օրինակ՝ եթե դեղը Գերմանիայում ստացել է թույլտվություն և ազատ շրջանառվում է այնտեղ, Հայաստան ներմուծելիս պետք է կրկին գրանցվի Հայաստանում։ Այդ գործընթացը տևում է ամիսներ, երբեմն՝ տարիներ։ Դրա հետևանքով խոշոր դեղագործական ընկերությունները պարզապես չեն գալիս Հայաստանի փոքր շուկայի համար առանձին գրանցում անցնելու։
Եթե մենք այս համակարգը փոխենք, ապա, մեր հաշվարկներով, դեղերի գների նվազումը չի սահմանափակվի միայն 20 տոկոսով․ որոշ դեղերի դեպքում այն կարող է հասնել մինչև 50 տոկոսի։ Սա կթեթևացնի առողջապահության բյուջեի բեռը և հնարավորություն կտա բժշկական ապահովագրությունը իրականացնել ավելի լայն սպեկտրով»,-ասել է Նարեկ Կարապետյանը։
