ՌԴ նախագահ Վլադիմիր Պուտինի հետ հանդիպումը կարող է կայանալ ԱՄՆ-ում կամ Մերձավոր Արևելքում․ Զելենսկի

ՌԴ նախագահ Վլադիմիր Պուտինի հետ հանդիպումը կարող է կայանալ ԱՄՆ-ում կամ Մերձավոր Արևելքում, կարծում է Ուկրաինայի նախագահ Վլադիմիր Զելենսկին, հաղորդում է ՏԱՍՍ-ը։

«Ես պատրաստ եմ հանդիպել Պուտինի հետ։ Հաստատ ոչ Մոսկվայում և ոչ էլ Կիևում։ Բայց կան շատ վայրեր, որտեղ կարելի է հանդիպել՝ Մերձավոր Արևելքում, Եվրոպայում, Միացյալ Նահանգներում»,- ասել է նա իտալական RAI ռադիոկայանին տված հարցազրույցում։

Զելենսկին նաև հայտնել է ԱՄՆ-ի մասնակցությամբ բանակցային գործընթացի շարունակման մասին, որոնք կենտրոնացած էին Մերձավոր Արևելքի վրա։ 

Հունվարի 28-ին Ռուսաստանի նախագահի օգնական Յուրի Ուշակովը հաստատել էր Զելենսկուն ուղղված հրավերը՝ ժամանել Մոսկվա, եթե վերջինս ցանկանում է անձնական հանդիպում ունենալ Պուտինի հետ։ Դիվանագետն ընդգծել էր, որ Մոսկվան պատրաստ է ապահովել Զելենսկու անվտանգությունը և աշխատանքի համար անհրաժեշտ պայմանները։ Ուշակովը նաև նշել էր, որ Մոսկվան երբեք չի հրաժարվել Պուտինի և Զելենսկու շփումներից, սակայն այդ շփումները պետք է լինեն պատրաստված և արդյունքին միտված։

Հենց որ Ռուսաստանը երաշխավորեց Զելենսկու անվտանգությունն ու աշխատանքային պայմանները, վերջինս փոխեց հռետորաբանությունը։ Նա հայտարարեց, որ մտադիր չէ մեկնել Մոսկվա և հանդիպում առաջարկեց արդեն Կիևում՝ միաժամանակ իր պնդումներն այնպես ձևակերպելով, ասես հենց ռուսական կողմն է շահագրգռված նման շփումներով։ Ռուսաստանի պետության ղեկավարի մամուլի քարտուղար Դմիտրի Պեսկովը հիշեցրել էր, որ հենց Զելենսկին է Պուտինի հետ հանդիպում խնդրել, և ոչ թե հակառակը։