Սյունիքի ոստիկանապետը զոհվածի մորը արգելեց մեկնել Երեւան ԴՆԹ թեսթ հանձնելու և որդու դիակը ճանաչելու համար. Մելիքյան

Սյունիքի ոստիկանության պետ, փալքովնըք Ալիկ Հակոբյանը զոհվածի մորը արգելեց մեկնել Երեւան ԴՆԹ թեսթ հանձնելու եւ իր որդու դիակը ճանաչելու համար: Այս մասին Facebook-ի իր էջում գրել է «Իրավկան ուղի» ՀԿ համահիմնադիր Ռուբեն Մելիքյանը, ով նաեւ տեսանյութ է տեղադրել:

Տեսանյութում կինն ասում է. «Հոկտեմբերի 3-ին իմ երեխան զոհվել է, մինչեւ այսօր դին չկա: Հիմա ես գնում եմ անալիզը բերեմ, ո՞նց գնամ: Երեւանից զանգել, ասել են՝ դիեր կան, եկեք ԴՆԹ տվեք, հիմա ես ո՞նց գնամ իմ երեխուն գտնեմ: 4 երեխա ունի, որից մեկը ծառայում է «Եղնիկներում»:

Ի պատասխան Ալիկ Հակոբյանն ասում է. «Ներողություն եմ խնդրում, մայրիկ ջան, ես քո հարցին չեմ կարող պատասխանել: Մեքենայով ոչ ոք չի անցնելու»:

Ավելի վաղ NEWS.am-ը հայտնել էր, որ վաղ առավոտյան, Սյունիքի բազմաթիվ բնակիչներ հավաքվել են Շինուհայրի խաչմերուկում, որոնք ցանկանում են առաջանալ, փակել Սյունիքի դարպասներն ու արգելել վարչապետ Նիկոլ Փաշինյանի մուտքը մարզի տարածք:

Ոստիկանությունը ավտոբուսներով մեծաթիվ ուժեր է կուտակել այս հատվածում՝ արգելելով քաղաքացիներին դուրս գալ Գորիս քաղաքից ու իրականացնել նախապես պլանավորած բողոքի ակցիան:

Վաղ առավոտյան ձերբակալվել է Գորիսի քաղաքապետ։ Առուշ Առուշանյանը: Նա ժամեր առաջ հանդես էր եկել կոչով, որով հորդորում էր գորիսեցիներին միանալ ավտոերթին, որը նպատակ ուներ խոչընդոտել վարչապետ Նիկոլ Փաշինյանի այցը Սյունիքի մարզ։