Նիկոլ Փաշինյանի խոսքերով, կանեփը շատ կարևոր արդյունաբերական հումք է. Հայաստանում զարկ կտրվի արդյունաբերական կանեփի արտադրությանը
ՎիդեոԱյսօր կառավարությունը քննարկեց ու ընդունեց Տնտեսական արձագանքման ծրագիրը և գործողությունների նախնական պլանը հաստատելու մասին նախագիծը (հարց համար 30):
Ծրագիրը, ինչպես նշեց զեկուցող Տիգրան Ավինյանը, շեշտադրում է երեք հիմնական գերակայություն՝ տնտեսական ակտիվության վերականգնման արագացում, վստահելի գործարար ու սպառողական միջավայրի ապահովում, միջնաժամկետ տնտեսական քաղաքականության օրակարգի ձևավորում:
Ծրագրով նախատեսված է թվով 12 նպատակային գործողություններ և 14 աջակցության ծրագրեր:
Նպատակային գործողությունների առանցքում է օրինակ գյուղատնտեսության ոլորտում բարձր ավելացված արժեք ստեղծող նոր մշակաբույսերի աճեցման ու վերամշակման համար անհրաժեշտ նախապայմանների ապահովումը. «Այստեղ կարող եմ շատ կոնկրետ օրինակ բերել, դա արդյունաբերական կանեփն է, որի արտադրության բավականին դրական փորձ ունեն Ռուսաստանը, ԱՄՆ-ը, Չինաստանը: Մենք նույնպես կարգավորումների առումով այս դաշտը ստեղծելու ենք»:
Ավինյանը մի քանի օրինակ էլ ներկայացրեց աջակցության ծրագրի շարքից:
Փաշինյանը, խոսելով մասնավորապես արդյունաբերական կանեփի մշակման մասին, հայտարարեց, որ այն կարևոր ծրագիր է ու շատ կարևոր է, որ այն ճիշտ լուսաբանվի, որպեսզի շահարկումներ չլինեն, մարդիկ տեղեկանան, թե ինչի մասին է խոսքը. «Ցավոք, կանեփ ասելով այլ բան են հասկանում, մինչդեռ կանեփը շատ կարևոր արդյունաբերական հումք է:
Տվյալ դեպքում արդյունաբերական հումքի մշակման մասին է խոսքը: Իհարկե այն իր հետ ռիսկեր ունի, սակայն կան նաև ռիսկերի կառավարման մեխանիզմներ, որոնք մի շարք երկրներում արդեն փորձարկված են: Մենք շատ ուշադիր պետք է ծրագիրն առաջ տանենք»:
